Irukurutzetako erromeria (eu)

    Sorapediatik

    Kokapena

    Elosua-Plazentzia mendilerroko gailur altuena Irukurutzeta da. Mendi hau burnizko gurutz hirukoitzak koroatuta dago, Azkoitia, Bergara eta Elgoibar-en udal lurren mugarria dena.

    Tontor ondoan trikuharri bat dago, eta urrutiago Arribiribilleta izeneko monolito handia.


    Irukurutzetako erromeria (Plaentxia.com 2013)

    Erromeria

    Maiatzaren lehen igandean erromeria ospatzen zen, trikuharri ondoko zelaian. Azken urteetan erromeri honek ez zeukan erligio kutsurik, baina bai aurretik.

    Aintzinean Lezarrisoroko (Bergarako baserria) agure bat Irukurutzetako tontorrera urtero igotzen omen zen, Maiatzako lehen igandean, bere kapelaren zintan gurutze bat zeramala. Berarekin jende asko joaten zen, eta inguruko herrietako ehundaka lagun hurreratzen ziren: azkoitiarrak, elgoibartarrak, osintxuarrak, plazentziatarrak...

    Azkeneko denboretan ez zuen gurutzerik eramaten, baina jende gaztea urtero ospatzen zuen erromeria dantzaz eta meriendaz.


    Berreskurapena

    Erromeria hau ospatzeari 1.955 urtean laga zioten. 1.980en hamarkadan berpizten saiatu zuten, baina alferrik.

    2000. urtetik hona berriro ospatzen ari da, maiatzeko lehen domekan. Inguruko herrietatik jendea mendi txangoa eginez etortzen da, eta 11ak aldera Osintxuko Txurrunbilo elkartekoek zuten salda eta txorixoa banatzen dute. Goiz ederra pasatzeko aukera ona.