Soraluze izena (eu)
Izenaren jatorria
Ezaguna da Soraluzeri Gaztelako Alfonso XI erregeak hiri-gutuna eman ziola, 1343. urtean hain zuzen. Gainera, nahiz eta hiri-gutun hori galduta egon, aipamen historikoei jarraituz bertan agertzen zen Soraluce lehen aldiz: ...Alfontso Erregeak... herri eta hiribildu bat sortzeko agindu zuen... Soraluze eta Herlabia izeneko landa lurretan[1].
Izena herriko geografiak eragin zuen, haran estu batean kokatuta dagoela: soro + luze.
Alfonso XI. erregeak Placencia de Soraluce izena eman bazion ere, ordutik aurrera Placencia izena gailendu zen, hainbat aldaerekin. Soraluze izena oso gutxitan agertu zen agirietan, gehienetan historia liburuetan (Alfonso XI.ak hiribildua sortu zuela kontatzen dutenean).
Mende askoren isiltasunaren ondoren, Soraluze izena XX. mende hasieran agertu zen berriro.
Ortografiaren bilakaera
Izena gutxitan agertu bada ere, aldaerak izan ditu ortografia finkatu arte. Batez ere zazpigarren letrak edo grafemak "dantza" egin du, idazlearen arabera c, ç edo z jarriz toki horretan. Hau da:
- S O R A L U (c,ç,z) E
XX. mendean izena berriro agertu zenetik modu berean idatzi izan da agirietan: Soraluze. Hala ere, gerra ostean Soraluce idazkera erabili izan zen, bai Soraluce zineman (1950. hamarkadan), baita Soraluce kooperatiban (1960. hamarkadan).
Euskal Onomastikaren Datutegia
Azterketa hau ontzeko Euskaltzaindiak prestatu zuen Euskal Onomastikaren Datutegia[2] erabili izan da.
Datutegi horren arabera, Soraluze izena ofiziala izan zen arte (1988) agerpenak hauek izan dira:
| Izena | Agerpenak | XIV. mendea | XV. mendea | XVI. mendea | XVII-XIX | XX. mendea |
|---|---|---|---|---|---|---|
| Plazencia de Soraluce | 4 | 1397 (3) | 1562 | |||
| Plazençia de Soraluçe | 1 | 1453 | ||||
| Soraluze | 10 | 1912, 1934, 1974 (2), 1976, 1978, 1979,1986 (3) |
Erreferentziak
- ↑ "...el rey don Alonso mandó hazer... otra nueva población y villa... en las tierras llamadas Soraluce y campo de Herlaguia". Los XL libros del Compendio historial de las chronicas y universal historia de todos los reynos de España. Esteban Garibai (Amberes, 1571).
- ↑ Euskal Onomastikaren Datutegia. Leku izenak. Soraluze. Euskaltzaindia.