Soraluzeren armarria (eu)

Armarri zaharra

Udaletxeko armarria (Pilar Rivera 1997)

Azalpena

Armarriaren esparrua rocaille formakoa da, eta soka luzea dauka inguruan. Fondo gorria (gules) du eta erdian urrezko gaztelua dauka, honen almenetatik bi banderatxo zuri irteten direla, alde banatan, Borgoinako gurutzea dutenak.

Esparuraren kanpoaldean, alde banatan bere koloreko lehoi bana, aurreko hankekin armarria oratzen dutela; atzeko hankak, berriz, artilleriako kanoi banatan bermatuta daude, armarriaren azpian gurutzatuta, eta eskuinekoak ahoa gorantz eta ezkerrekoak beherantz dutela.

Lehoien gainean, bi bandera alde banatan, lau guztira, zuriz bata eta gorrixkaz bestea. Eta alde banatan eta hurrena besteen azpian, burgundiar gurutzedun bandera zuria.

Multzo osoa apainduz, antzinako gerra-tresna ugari daude: kasketak, espingardak, lantzak, mazoak, ezpatak, trabukuak, etab. Eta horren guztiaren gainean, bederatzi puntako koroa bat.

Balizko interpretazioak

Armarrian Borgoinako gurutzea duten hainbat bandera zuri agertzen dira. Soraluzeko bandera izan daiteke (ala alderantziz), edota Gipuzkoako udaletan bizilagunen konpainia militarrek erabili zuten "bandera koronela", haratago joan barik.

Lehoien gaineko bandera zuriak eta gorriak armaginen lau gremioak ordezkatuko litzateke.

Bederatzi puntako koroa kondeena izaten zen, baina Soraluze ez zen inoiz izan "kondepekoa", Oñati moduan.

Eta aintzinako gerra-tresnak Soraluzeko Erret Lantegiek hornitzen dituztenak izan zitezkeen. Kainoiak ere armagintzarekin lotu zitezkeen... baina XIX. mende bukaera arte ez ziren kainoirik egin Soraluzen.

Ale fisiko zaharrenak

Udaletxearen etxeaurrean badago harrizko armarria, XVIII. mende bukaerakoa.

Udaletxean bertan ere, osoko bilkuren aretoan bada olio pintura bat, herriaren armarria irudikatzen duena.

Bertsio okerrak

Historian zehar Soraluzeren armarria hainbatetan erabili, deskribatu edota irudikatu dute, baina ez beti modu zehatzean.

Pablo Gorosabelek bere hiztegian jasotzen du lehoiak armarriaren esparruan daudela, era ez kanpoan.

Fausto Arocenaren arabera, Gipuzkoako Aldundiaren jauregiko beirate baten bueltan, bada armarri bat Soraluzekoa izan nahi duena: esparru gorrian gaztelua dakar, eta honen azpian bi lehoi ditu, alde batera eta bestera irtetzen ari direnak. Donostiako Justizia Jauregiko beste beirate batean ere gauza bera gertatzen da.

1876.eko sigilua

Urteekin, armarriaren irudiarekin Udalak sigiluak sortu zituen, agiri ofizialei "benekotasuna" emateko.

1876.ean, bigarren karlistada bukatu berria, eta gobernadore zibilen bidez, Madrilgo gobernuak udal guztien sigiluen txantiloia eskatu zuen.

Udazkenean Ciriaco Larrosak, Soraluzeko alkateak, Donostiako gobernadore zibilari erantzun zion:

Udalerrietako zigiluei buruz xedatzen dena betez, agiri honen bazterrean eta honekin batera doan beste orri zuri batean aurkituko du berorrek hiribildu hau oso antzinatik erabiltzen duena; gainera, Udaleko langile guztiak berriak izanik eta artxibo osoa arretaz aztertu eta gero, zigiluaren historiarik ez dagoela eta ez dela ezagutzen adierazi behar diogu berorri; eta jakinarazten diogu erdian dagoena gaztelu bat dela, bi bandera dituena, kuartelari eusten dioten bi lehoi dituena, eta armarri beretik trofeo itxurako armak eta banderak ateratzen dira.

Ahal den guztia egingo dugu historia hori ikertzeko eta, zerbait aurkituz gero, bidali egingo diogu berorri.

Eta hau da esan ahal diodana, erregearen gobernuak proposatzen duen helbururako.

Jaungoikoak berori gida dezala urte askotan. Soraluze, 1876ko irailaren 15a.

Alkatea

Ciriaco Larrosa

Gipuzkoako Gobernadore Zibila

Donostia

Argi ikusten denez, 1876.eko sigilua armarriaren bertsio "arina" da: gaztelua erdian, bi banderekin, bi lehoi ezker-eskuman, bina bandera bakoitzaren atzean, bost puntako koroa eta "trofeo" itxurako batzuk azpian.

Siguluaren inguruan gaztelerazko testua dator: N. Y L. VILLA DE PLACENCIA DE LAS ARMAS (euskaraz, Soraluzeko hiribildu noble eta leiala).

En cumplimiento de lo que se dispone respecto de los sellos de los municipios, hallarà V.S. al margen de este pliego y en otro en blanco que le acompaña, el que usa esta villa desde muy antiguo; debiendo manifestarle ademàs que siendo nuevo todo el personal del Ayuntamiento y habiendo revisado detenidamente todo el qarchivo, no se encuentra ni se sabe la historia del sello; advirtièndole que lo que se halla en el centro es un castillo con dos banderas, dos Leones sosteniendo el cuartel y del mismo escudo salen armas y banderas en forma de trofeo,

Se harà todo lo posible para la averiguraciòn de la referida historia, quedando en mandarlo si es que algo se averigua.

Es cuanto puedo decirle a V.S. para el objeto a que se propone el gobierno de S.M.

Dios guìe a V. S. m. a. Placencia 15 de Setiembre de 1876

El Alcalde

Ciriaco Larrosa

Sor. Gobernador Civil de Guipuzcoa San Sebastiàn

• 

  Logo zaharra

• 

  Koloretako logoa

• 

  Zuri-beltzeko logoa

Gaur eguneko logoa

Soraluzeko armarria, sigilu moduan, udalaren "logo" moduan erabili izan da aspalditik: tinta sigilua hasieran, inprimaki ofizialen burualdean gero, kaleko seinaletan...

Eta, beste herri askoren moduan, XX. mende bukaeran armarrian oinarritutako logoa birdiseinatzea erabaki zuten. Itxura arinagoa eta modernoagoa emateaz gain, gaur eguneko euskarrietan erabilerreztasuna bilatzen zen: paper eta agirietan, sinaletikan, web orrietan… Bi bertsio sortu zuten, bata koloretan (berde eta horia) eta zuribeltzean bestea.

Diseinu berriak armarriaren osagai esanguratsuenak gordetzen ditu, berrinterpretatuak: gaztelua erdian, bi bandera alde banatan eta guztiaren gainean koroa.

Armarriak forma "normala" dauka, inguru beltz sendoa. Oraingo fondoa berdea da, aurreko gorria beharrean.

Gaztelua, hori kolorekoa, aurrekoa baino handiago eta osoagoa da. Azpiko solairuko erdian atea eta bi leiho dauzka, eta goikaldean lau almena zabal. Honen gainean hiru dorretxo, erdikoa beste biak baino altuagoa.

Gaztelu ertzetatik irtetzen diren bi bandera beltzek armarriaren hegala zeharkatzen, eta honen ertzak goitik beherako marra berde zabala marrazten die.

Goi aldeko koroak oinarri beltza du. Bederatzi "puntak" gordetzen ditu, borobilak, horiak eta kanpotik barrura gero eta handiagoak.

Erreferentziak

• Placencia de las Armas. Ramiro Larrañaga (Donostia 1970).
• El escudo municipal. Ramiro Larrañaga (Soraluzeko jaiak 1988).
• Soraluzeko Udala. Web orri ofiziala.